Arun nato makita kung asa mupaingun ang atong mga binulan nga bayad sa kuryente, among paninguhaon nga mai’pakita ang kinatibuk-an sa atong monthly power bill ug himay-himayon ang mga rason sa kada linya niini.
Asa mupaingun ang inyong gibayad ug arun mapasabot nga dili lamang ang MORESCO-1 ang inyong gibayran. Ang tanang taripa nga mulangkub sa kinatibuk-an balayrunon sa mga konsumidor sa kuryente, miagi ug pagsusi, pagtuki ug inaprobahan kini sa Energy Regulatory Commission (ERC),usa ka ahensiya sa gobyerno nga maoy adunya mandato sa kung pila ang balayrunon sa kuryente gikan sa paghimo, pag-angkat, pagpalit, pag-apud-apud ngadto sa mga end-users.
RASON
Ang presyo sa COAL sa world market niini GASAKA PA GIHAPON bisan pa man nga ang Diesel ug Gasoline sa market mi-ubos o mi’kunhod na. Kini tungod kay ang demand sa kalibutan sa COAL taas pa gihapon kaayo apan ang gi-mugna o gi-mina niini gamay ra. Kini tungod kay aduna pa gihapoy mga nasod nga kaniadto gikuhaan sa COAL apan karon wala na naka produce tungod sa gubat sa RUSSIA ug UKRAINE.
Sa Generation, adunay PAGUBOS o PAGKUNHOD sa presyo sa kuryente balor ug Php 0.1645 kada kWh (Residential Consumers) tungod kay nakakuha kita ug medyo ubos nga Generation Rate sa pipila sa atong mga power suppliers. Adunay gamay nga pag-ubos apan DILI kini kasiguruhan nga adunay padayun nga pag-ubos sa atong presyo sa kuryente sa sunod nga mga bulan.
ANG “TRUE COST” SA ATONG SYSTEM LOSS CHARGE
Mao kini ang nawala nga kurente gikan sa tinubdan (GENERATION) paingon sa High Voltage line ni NGCP nga gidawat sa Substation ni MORESCO-1 aron iyang ipahaom ang boltahe nga sarang magamit sa kabalayan.
Sugod sa bulan sa November 2022 ang true cost of System Loss Charge na ang gipahamtang tungod kay nahuman na ang atong adjustment niini. Mao nga ang P1.0270 /kwh nga System Loss ug ang pag’ubos niini nakatabang sa pag-ubos sa POWER RATES
ANG ATONG DSM – Distribution, Supply and Metering
Ang binuloan nga kantidad nga P1.9561 matag kWh nga mopaingun sa MORESCO-1 isip distribution utility – electric cooperative, gamiton arun makasustento sa operasyon niini, ug pagpadagan sa negosyo sa kuryente. Kini nga kantidad, walay pagtaas gikan pa sa tuig 2010.
Ang MORESCO-1 nahimo lamang COLLECTOR sa ubang taripa arun ibayad sa planta sa Generation sa sugang dagitab ug elektrisidad, sa NGCP ug buhis alang sa Gobyerno.
Hinaot nga amo kamong mapasabot ug matagaan kami ug panahon nga ipasabot kining mga panghitabo nga nakaingun sa kamahal dili lamang sa kuryente, apan apil na usab ang mga lain-laing mga consumer goods and services nga atong gisagubang karun.
Daghan salamat.