Ang MORESCO-1 nagpahibalo sa tanang mga Member-Consumer-Owners (MCO) nga pagahimoon ang District Election sa District 5 – Libertad arun sa pagpili sa representante sa maong Distrito ngadto sa Hunta Directiba sa MORESCO-1. Kini pagahimoon karung Sabado, Abril 11, 2026, gikan sa alas-8:00 sa buntag hangtud alas 3:00 sa hapon, sa Libertad National High School.
Giawhag ang tanang kwalipikadong MCO nga susihon ang ilang ngalan sa Masterlist of Voters nga gipahimutang sa Municipal Hall Bulletin Board, Barangay Bulletin Boards, ug sa MORESCO-1 Corner. Importante kini aron masiguro nga kamo rehistrado ug adunay katungod sa pagboto. Palihog hinumdumi nga ang mga bag-ong miyembro nga wala pa makakompleto og 90 ka adlaw nga membership sa dili pa ang adlaw sa eleksyon, dili pa mahimong makabotar.
Gidasig usab ang tanan nga tan-awon ang Calendar of Activities, ilabi na ang Inclusion–Exclusion Period, aron mahibal-an ang hustong pamaagi sa pagpaapil o pagpausab sa inyong rekord kon gikinahanglan. Kini aron malikayan ang bisan unsang kalibog o problema sa adlaw sa eleksyon.
Sumala sa By-Laws sa kooperatiba, hugot nga gidili ang proxy voting. Busa, ang matag MCO kinahanglan personal nga motambong aron makabotar. Palihog dad-a ang inyong valid ID alang sa hapsay ug paspas nga verification sa polling area.
Ang inyong aktibong partisipasyon maoy nag-palig-on sa atong Kooperatiba sa kuryente ug naghatag og direksiyon sa atong liderato. Ang inyong boto, ang inyong tingog.
